Mendimin këshillëdhënës të GJND-së, sipas të cilit shpallja e pavarësisë së Kosovës është në pajtim me të drejtën ndërkombëtare, është pasqyruar me shpejtësi nga mediat më prestigjoze në botë
Lajmi është pasqyruar në BBC e CNN, nga agjencia Reuters, AP, France Press dhe Xinhua e Kinës, e cila ka lajmëruar se shpallja e pavarësisë së Kosovës nuk e ka shkelur të drejtën ndërkombëtare, ndërsa AP ka shtuar se në të ardhmen do të forcohen përpjekjet për njohje të reja të shtetit të Kosovës.
Edhe Televizioni austriak ORF e ka transmetuar si lajm kryesor mendimin e GJND-së e po kështu kanë vepruar edhe botimet elektronike të gazetave të përditshme austriake.
Sipas gazetës gjermane Velt, vendimi i GJND-së mund të ketë "ndikim në një sërë lëvizjes separatiste anembanë botës"
Agjencitë ruse të lajmeve në kohë reale, si lajmi I fundit kanë publikuar mendimin e GJND-së.
"Itar-tas" ka shkruar se gjykata e ka njohur legjitimitetin e shpalljes së pavarësisë së Kosovës, kurse RIA-Novosti ka shkruar shkurt se GJND-ja njohu pavarësinë e Kosovës.
Portali Neësru.com ka vlerësuar se GJND-ja 'nuk e ka mbajtur anën e Serbisë" dhe ka vlerësuar se "në shkëputjen e Kosovës nuk ka gjetur asgjë jashtëligjore".
Mediet polake e çeke kanë thënë se ky mendim është nxitje për njohje të reja të Kosovës.
"Haga ka vendosur-Kosova mbetet e pavarur", njoftoi kanali televiziv publik çek ČT24.