Disa historianë e studiues, shumica të njohur si militues pranë Partisë Demokratike dhe qeverisë në pushtet, janë “punësuar” së fundmi nga qeveria për ndryshuar historinë e vendit. Arkivat e shtetit dhe të Kuvendit të Shqipërisë janë vënë në dispozicion të këtyre historianëve, të cilët po përgatisin disa botime që prekin momente të rëndësishme të historisë së Shqipërisë. Projektet në fjalë, që kryesisht po zbatohen nga disa institute pranë qeverisë, pritet të shohin dritën e diellit brenda këtij viti, që shënon dhe 100-vjetorin e Pavarësisë. Edhe pse akoma nuk dihet se çfarë do të sjellë të re kjo histori e shkruar me shpejtësi dhe me urdhër nga kryeministri, një gjë është e sigurt, ajo do të jetë ndryshe nga historia që kemi njohur deri më sot. Këtë e ka paralajmëruar vetë kryeministri Sali Berisha disa herë në kuadër të 100 vjetorit të pavarësisë duke thënë se na duhet një rivlerësim i ngjarjeve dhe i personaliteteve. Ja çfarë tha ai vetëm disa ditë më parë në mbledhjen e Komitetit Ndërministror për kremtimin e 100 vjetorit të pavarësisë së Shqipërisë. “Shpresoj që studiuesit të mbajnë parasysh vlerat e personaliteteve dhe zhvillimeve të mëdha. Historinë e kemi patur të vështirë e të mundimshme. Gabim i madh për ne që në emër të korrigjimit të padrejtësive dhe manipulimeve të lejonim manipulime të reja. E them këtë sepse kjo përbën një rrezik serioz dhe do të ishte një gjë e pafalshme për ne. Asnjë komb i qytetëruar nuk kursen atë që quhet tradhti kombëtare se pastaj e errëson shumë të ardhmen e tij”, u shpreh Berisha. Kryeministri tha se rishqyrtimi i historisë nuk duhet të mbetet në fushën interpretative por kryesisht në fushën e dokumenteve dhe interpretimet të bëhen mbi bazën e dokumenteve të qarta.
Burimi
214971 lajme
«
Me shume/Titujt
Gazeta Tema
-
Brenda vitit shqiptarët do kenë ‘historinë’ e Berishës
Postuar: 07.02.12 06:39:36 nga TemA